අරීසෙන් අහුබුදුවන් මෙ තෙක් ලබා ඇති හරසර බුහුමන් සම්මාන ඉතා බොහෝ ය. මෙහි සඳහන් කැරෙන්නේ එයින් ඉතා වැදැගත් කිහිපයක් පමණෙකි. සුබස සඟරාව මඟින් පවත්වන ලද පැදි තරග කිහිපයෙකින් ම මුල් තැන ලැබූ අහුබුදුවෝ 1940 දී කුමාරතුංගයන් අතින් කිවිති නම ලැබූ හ. 1945 දී ජයන්ත වීරසේකරයන් අතින් කිවි නම ලැබූ හ. 1962 දී හෙළ හවුලින් මහ කිවි යනු ද 1985 දී හෙළ උරුමයෙන් කිවිසුරු යනු ද ඔවුනට පිරිනැමිණ.

1984 දී කලාසූරී යන ගරු නමින් සිරිලක් රජය ඔවුනට බුහුමන් කළේ ය. 1991 දී හෙළ බස් ඉසුරු ගරු නම හෙළ හවුලින් පිරිනැමිණ. 1962 දී පරෙවිය කව සඳහා ද 1969 දී රස දහර මහ කව සඳහා ද 1987 දී අතු අගැ දිලි වන මල් ගී පොත සඳහා ද රජයේ සාහිත සම්මාන ඔවුනට පිරිනැමිණ. හඳයා චිත්‍රපටයට ලියූ ගී සඳහා 1979 හොඳ ම ගී පබඳුවාට හිමි සරසවි සම්මානය ද ඔවුනට හිමි වී ය.